Փնտրում եք բարձր վարձատրվող աշխատանք՝ սեղմեք ԱՅՍՏԵՂ
Ինչպես ավելի վաղ տեղեկացրել էր News.am-ը այսօր մահացել է լրագրող, սցենարիստ, հաղորդավար Գայանե Փայտյանը: News.am STYLE-ը ներկայացնում է լրագրողի կյանքն ու անցած ուղին: Գայանե Փայտյանը ծնվել է Երեւանում՝ 1974 թվականի հունիսի 30-ին`մանկավարժ մոր եւ ինժեներ հոր ընտանիքում:
Լրագրող դառնալու որոշումը կայացրել է ավարտական դասարանում`հակառակ բժիշկ դառնալու նախնական ցանկությանը: ԵՊՀ-ում կրթության ընթացքում մահացել է Գայանե Փայտյանի հայրը եւ ապագա լրագրողուհին ստիպված է եղել ուսմանը զուգահեռ աշխատել`վատառողջ մոր եւ 5-ամյա քրոջ ապրուստը հոգալու համար: Միաժամանակ աշխատել է թե՛ հեռուստատեսությունում, եւ, հակառակ արդեն ճանաչված լինելուն, գիշերները բանվորի աշխատանք է արել տպագրատանը:
1991 թվականից, երբ դեռ առաջին կուրսի ուսանող էր, աշխատել է Հայաստանի Հանրային հեռուստաընկերությունում(այն ժամանակ կոչվում էր Հայաստանի ազգային հեռուստաընկերություն), 1992-1994 թվականներին «Ա1» հեռուստաընկերությունում: 1996 թվականին, երբ ազգային հեռուստաընկերությունը որոշում է կայացնում փոխել եթերային քաղաքականությունը, արդեն համալսարանավարտ Գայանեն՝ չհարմարվելով փոփոխություններին դուրս է գալիս աշխատանքից եւ տեղափոխվում նորաբաց «Նորք» հեռուստաընկերություն(Հայկական երկրորդ պետական ալիք)՝ դառնալով լրատվական տնօրենն ու մեկնարկելով «Ծանոթ անծանոթ» հաղորդաշարը: 1994 թվականին Ֆրանսիայի «Պոռ դը Բուք» փառատոնի ժամանակ Երեւանի կենդանաբանական այգու մասին Գայանե Փայտյանի ֆիլմը ընդգրկվել է կավագույն հնգյակում:
2000-2008թթ եղել է ՀՀ Ազգային Ժողովի հասարակայնության հետ կապերի վարչության գլխավոր մասնագետը։ 2004թ-ից միջազգային հեռուստատեսային ակադեմիայի անդամ է։ 2008 թվականին հիմնել է հաղորդավարների եւ լրագրողների «TV Իդեալ» դպրոց-ստուդիան:
Բազմաթիվ հաղորդումների եւ փաստավավերագրական ֆիլմերի հեղինակ էր: Վերապատրաստվել էր ԱՄՆ-ում, Եգիպտոսում եւ մի շարք սեմինարների մասնակցել Եվրոպական տարբեր երկրներում: Դասախոսել է Հայաստանի Ֆրանսիական եւ Խաչատուր Աբովյանի անվան պետական մանկավարժական համալսարանում: Ամուսնացած էր, ուներ երկու դուստր:
