Ի՞նչ է փնտրում «Հալո Թրաստ»-ը Հայաստանում և Արցախում. Արայիկ Պարոնյան

«Հայոց Արծիվներ. Միասնական Հայաստան» կուսակցության փոխնախագահ Արայիկ Պարոնյանն իր ֆեյսբուքի էջում գրում է.

Ռուսաստանի և Անգլիայի միջև հակամարտությունը ունի դարերի պատմություն, որը պայմանավորված է Հայկական բարձրավանդակում, մասնավորապես Կովկասում նրանց կողմից ազդեցություն հաստատելու հանգամանքով: Այդ էր պատճառը, որ դեռևս Ղրիմի Ռուս-Թուրքական պատերազմի ժամանակ անգլիացիները զենք-զինամթերքով օգնեցին Թուրքիային և 1856 թվականին Փարիզի հաշտության պայմանագրով ռուսական զորքերին դուրս մղեցին Արևմտյան Հայաստանից:

Նույն չարաբաստիկ դերը խաղաց Անգլիան 1878 թվականին Բեռլինի վեհաժողովին, բավական է հիշել այն ժամանակվա Անգլիայի վարչապետի հայտնի խոսքերը «Անգլիական նավերը չեն կարող բարձրանալ Հայկական Տավրոսի լեռները»:
Ռուսաստանի դաշնակից Հայերի նկատմամբ անգլիացիների թշնամական վերաբերմունքի վառ ապացույց է ազգությամբ հրեա անգլիական հետախուզության սպա Լոուրենս Արաբացու հարցազրույցը «Այդ անտանելի Հայերը» թեմայով, ինչպես Նաև 1918 թվականին անգլիացի գնդապետ Թոմսոնի կողմից Զորավար Անդրանիկին Զանգեզուրով Ղարաբաղ անցնելու և տեղի հայությանը օգնելուն խոչընդոտելը: Իսկ Խորհրդային Միության տարիներին այն արտահայտվում էր Սառը պատերազմով:
Խորհրդային Միության փլուզումից հետո Անգլիան շարունակեց իրականացնել իր դարավոր երազանքը՝ Ռուսաստանին դուրս մղել Հարավային Կովկասից, մասնավորապես Հայաստանից: Այդ նպատակով էր նաև, որ ՆԱՏՕ-ի անդամ պետությունների կողմից սկսվեցին հիմնադրվել տարատեսակ հասարակական կազմակերպություններ և խորհրդատվական ընկերություններ, որոնք առաջին հայացքից հետապնդում են մարդասիրական և գործնական նպատակներ, բայց իրականում դրանցով քողարկում են հատուկ ծառայությունների աշխատանքը և «տանիք» հանդիսանում գործակալների համար, նպատակ ունենալով տեղեկատվություն հավաքագրել հետխորհրդային հանրապետություններից:

Ուսումնասիրելով արտասահմանյան, մասնավորապես ռուսական լրատվամիջոցներում «Հալո Թրաստ»-ի մասին առկա տեղեկատվությունը նրան կարելի է դասել նմանօրինակ կազմակերպությունների շարքին: Բավական է նշել, որ ընկերությունն ունի շուրջ 3000 աշխատակից և ֆինասավորվում է ԱՄն-ի, Անգլիայի, Կանադայի և անհատ անձանց կողմից: Հետխորհրդային հանրապետություններում ընկերությունը հայտնվել է 1990-ականներին Մերձդնեստրում, Չեչնիայում և Կովկասում: Արցախում նրանք հայտնվել են 2000-ական թվականներին և ըստ առկա տեղեկությունների ականազերծել են շուրջ 300 հա. Տարածք, բայց իրականում ականազերծման աշխատանքների քողի տակ, իրականացրել են ողջ տարածքի լայնածավալ տեղագրական (տոպոգրաֆիական) հետազոտություն, համակցելով այդ բնակավայրերը ՆԱՏՕ-ի կոորդինատների համակարգին: Նշեմ նաև, որ ըստ ՆԱՏՕ-ում ընդունված դասակարգման Կովկասը մտնում է Անգլիական հետախուզության հետաքրքրությունների գոտու մեջ:
Համադրելով այս ամբողջը կարող ենք փաստել, որ իրականությանը մոտ է այն, որ վերջին Արցախյան պատերազմի ժամանակ Անգլիան առաջնորդվելով իր աշխարհաքաղաքական շահերով,ինչպես նաև Ադրբեջանական նավթային ընկերությունում իր հետաքրքրություններով, նույն «Հալո Թրաստ» ընկերությունը կարող էր Արցախի ողջ տարածքի ականապատման գաղտնի քարտեզները տրամադրել Թուրքիային, նույնն է, որ Ադրբեջանի հատուկ ծառայություններին, որը կարող էր լինել այդ պատերազմում մեր պարտության հիմնական պատճառներից մեկը: Ահա սա էր պատճառը, որ «Հայոց Արծիվներ. Միասնական Հայաստան» կուսակցությունը սույն թվականի մարտի 16-ին իրականացրեց իր ինքնաբուխ ակցիան Անգլիայի դեսպանատան մոտ՝ պահանջելով դադարեցնել իր լրտեսական գործունեությունը Հայաստանում:

Այս ամենը գալիս է ևս մեկ անգամ ապացուցելու, որ Հայ-Ռուսական ազնիվ, դաշնակցային հարաբերությունների խորացումը այլընտրանք չունի:

Արայիկ Պարոնյան